Andaikan Taniwel Itu Nona Manis

PUISI TOLAK TAMBANG MARMER

#SAVETANIWEL

Andaikan Taniwel Itu Nona Manis

Andaikan Taniwel itu nona manis

Kulit mulus kasbi kupas

Rambut ikal patah mayang

Biking nyong mata sajoo

Tangal nona Taniwel pung pesona

Nyong amper gila

Hari ke hari nyong dari pulau kapuk selalu jaga slak

Bulatkan tekad par maso minta nona

Nyong datang bawa mahar

Deng gula-gula tangke

Katanya mahar itu par kase kuat ikatan dua belah pihak

La gula-gula itu dong isap-isap jua, hilangkan dahaga

Nyong su kase mahar

Tapi nyong lupa kalau nona manis tampa di Taniwel

Potong pusar di Taniwel

Dapa kas makan papeda, kasbi rebus, tambah kelapa sisih

Siang malam nona manis dapa jaga

Kain berang malingkar di kepala

Salele parang di bahu

Karingat jatuh

Airmata tumpah

Cuma par jaga nona manis

Supaya jang orang biking sebarang

##

Andaikan Taniwel itu nona manis

Maso kamar, loncat jendela

Nona manis orang su loko

Tanya pung tanya

Dia su jadi tumbal

Demi capcay, fuyunghay, spageti, dan kawan-kawan

Datang par bangun istana mimpi

Deng jadi pendekar kalau basudara bataria lapar

###

Andaikan Taniwel itu nona manis

Ciom dia, kele dia

Sebab di rahimnya

Ada berjuta-juta nyawa tinggal di situ

Dan dia bawa mandat hidup orang basudara

Ambon - Batu Gantung, 1 November 2020

Jam 22:28 WIT